Apirilaren 4, 5 eta 6an, Danspirenaikak, Areatza tradiziozko dantzaren munduko hiriburua bihurtuko du, eta horren errudun, zati handi batean, Areatzako Banda da, berriz ere BANDtzaldiarekin gozatzeko aukera emango digu eta, dantzarako sorturiko musikarekin dantza eginez elkarrekin ondo pasatzeko. 

Pirinio inguruko herri askotan, musika bandak sortu ziren XIX. mendean hasita, eta beraien helburu nagusia herritarrok plazan dantzan jartzea zen. Aspaldian, musika bandak, ikuskizun eta kontzertuetara jo dute batez ere, horregaitik, ospatzekoa da Areatzako Bandak berriz ere plaza dantzan jartzea. Eta bide horretan, AIKO taldeak, duela urte batzuk martxan jarri zuen BANDtzaldia izango dugu Areatzako plazan apirilaren 5ean, larunbatez arratsaldeko 19:00tan.

BBK Fundazioaren laguntza duen BANDtzaldia arrakasta handiz estreinatu zen 2016an, Azkuna Zentroan, Bilboko Musika Bandarekin. Ondoren, Euskal Herritik giran ibili zen ikuskizuna: Errenterian, Portugaleten, Iruñean, Gasteizen, Eibarren, Barakaldon, Irunen, Lizarran eta Zarautzen besteak beste.

Areatzarako aukeratu den egitaraua Sabin Bikandi AIKO taldeko kide sortzaileak eta 2015eko musika konposizio hoberenaren Max saridunak idatzitako lanak osatzen dute. Joserra Gutiérrez Barakaldoko konposatzailea arduratu da moldaketez, lan bikaina eginez, abestiak bandaren egiturara egokitzeko. Eta guzti hori koordinatu eta dantzagarri egiteko Aritz Labrador izango dugu Areatzako Banda zuzentzen.

Ikus-entzuleek Bandaren musika entzuteko eta parte hartzeko aukera izango dute, pasodobleak, jotak, jauziak, txotisak, polkak, mazurkak, baltsak edo ingurutxoak dantzatuz, besteak beste, Aiko taldeko dantza maisuek animatuta.

APIRILAK 5

LARUNBATA 19:00

AREATZAKO PLAZAN

DANTZALDI ERROMERIA

AREATZAKO BANDA

ZUZENDARI: ARITZ LABRADOR

AIKO Taldea 

Musikariz eta dantza maisuz osatutako elkarte kulturala da, eta duela 10 urtetik musika eta dantza tradizionalaren ondare zabala hedatzen eta ezagutarazten eta erromerien izpiritu herrikoia berreskuratzen ari da lanean, dantzarako espazio berriak sortuz eta gero eta talde zabalagoa inplikatuz. Taldearen bokazioa "modu natural, erlaxatu eta dibertigarrian jo eta dantzan egitea" eta pasio hori ahalik eta pertsona gehienei helaraztea da.

Euskal Herri osoan eskainitako erromeria, ikastaro, tailer eta emanaldi ibiltari kontaezinekin batera, taldearen jarduera ez da zuzeneko emanaldietara mugatu. AIKO Taldeak dantza egiteko musikaz osatutako 10 disko argitaratu ditu, eta kultura herrikoiaren ondarea ikertzeko eta hedatzeko beste zenbait ekimenen protagonista izan da, Fasioren mendea (Bonifazio Arandia musikari arratiarraren bizitzari eta lanari buruzko lan zorrotza) edo Urraska-Dantza jauziak Sagasetaren bidetik (jauziak izenekoen errepertorio osoaren multimedia bilduma), edo jotari omenaldia eskaintzen dion Jotamentala dokumentala, adibidez.